বাইরকার সাঞ্জেবেলাত (রাজবংশী)

 ~তাপস সরকার

কেরম যেন মনে হইল্ আইজকা বিকাল বেলা

হঠাৎ ধরফর কুরি উটিল বুকের ভিতর টঅ

বইখান থুই চিয়ার থেকে উঠি পুরিনু, 

যদিঅ ইটঅ প্রথমবার নাহায়,

বুঝা পানু মন টঅ আইজকা এঙ্গনা বাইরত যাবা চায়, 

বাইরকার বিকালের ডুবানুয়া সুজ্জ দিখিবা চায়,

কিন্তু বাইরত জাইলে জাম কুন্না?

বাইরত জাইলে মোর ভিতরত থাকা আগের দিনের 

আস্তা, পাখি, গাছের পাত-লা আর জনাকি-লা পাম কুন্না? 

ভিতরত তহ সবাই আগের মতনে ছে, আর বাইরত!

যদি আসার পথে আইজকা সাঞ্জেবেলা হয় টুপকুরি? 

যাইহোক, মুই বাইরত ভেরানু 

সঙ্গে এঙ্গনা দুঙ্গনা আশা নি হনে,

ভ্যাপসা গরমত দিখিনু সুজ্জ টঅ ডুবিল বুঝি,

আন্ধারত দিখিনু দু-একখান সাদা মেঘ আর নড়ানুয়া শুকান পাত-লা,

বড় গাছের বড় আন্ধার ছিয়ালা আইজকা আর নাই,

নাই পাখিলার চিৎকার চেঁচামিচি 

আর নাই ভাসা থেকে পাখির ছুয়ালার সাঞ্জেবেলার ডাক,

এঙ্গনা সময় থাকিনু এরমে চুপ কুরি, বুঝিনু

সব কিছু পাই হনেঅ আইজকা যেন কিছুই পানুনি;

সিমেন্টের আস্তা টঅ ছাড়ি খলতার রাস্তা টঅ ধুরিনু, 

নরম কাদুলা চুটিলার আঘাতে ঠ্যাঙ্গত নাগিল বার বার 

কিন্তু ঠ্যাঙ্গত নাগা কাদুলা শুকাই গেল, মাটির গন্ধ পানুনি,

শুনিনু ঝিঁঝিঁ পকালাও ডাকিল, 

কিন্তু বাইরকার আন্ধাধুন কান্তালিতে বুঝা পানুনি,

আটাতে জঙ্গলত দু-চাইরটা শিয়ালঅ ডাকিল 

অমার ডাকে আর বাকিলার ডাক শুনা পানুনি, 

হটাৎ, বাড়ির ভিতরতিনা থেকে একটঅ বিড়ালের ছুয়া মেও কুরি উঠিল,

কেরম যেন খানিক খান আলাদা মতন খালি খালি নাগিল,

মনে হইল মোর আর বিশিখন বাইরত থাকা যাবা নাহা;

বাড়ির চালটাত দিখিনু বিড়ালের ছুয়াংনা মায়ের পিছনে হাটি গেল,

পাশঅতে ভাঙ্গা দুয়ালটার উপর টিকটিকি টঅ টিক্ টিক্ কুরি উঠিল,

সুধু মুই চাইনু

মোর ভিতরের জগতৎ অমরা যেন আগের মতনে থাকোক,

কষ্ট হইলেঅ বাইরকার বিকাল বেলাত মুই আসিম, 

কাদুর গন্ধ আস্তা, পাখি, শুকান পাত-লা আর জনাকি-লা আবার দিখিম,

একলায় বুসি থাকা শিয়াল আর ঝিঁঝিঁ পকালার ডাক আবার শুনিম,

কষ্ট হইলেঅ মুই আবার ভেরাম বাইরকার সাঞ্জেবেলাত।